अर्घाखाँची जिल्लामा विभिन्न कार्यक्रम सहित २१ औं भूकम्प सुरक्षा दिवस सम्पन्न
तस्बिर :
“विपद्बाट सुरक्षित हुने नागरिक अधिकारः पुरा गर्न जिम्मेवार संघ, प्रदेश र स्थानीय सरकार” भन्ने मूल नाराका साथ २१ औं भूकम्प सुरक्षा दिवस, २०७५ सन्धिखर्कमा भूकम्प सुरक्षा प्रभातफेरी, भूकम्प सुरक्षा प्रतिबद्धता ब्यानरमा हस्ताक्षर लगायतका कार्यक्रम गरी मनाईयो । स्थानीय शान्ति बगैंचाबाट भूकम्प सुरक्षा सम्बन्धी ब्यानर र प्ले कार्ड सहित शुरू भएको प्रभातफेरी बैङ्क रोड - मिडिया चोक - हललाईन - बसपार्क - चुत्रावेशी बजार हुँदै पुनः शान्ति बगैंचामा आई संक्षिप्त सभामा परिणत भएको थियो । प्रभातफेरी पश्चात जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी श्री प्रेमलाल लामिछानेको अध्यक्षता, जिल्ला समन्वय समितिका प्रमुख श्री पिताम्बर शर्मा भुसालको प्रमुख आतिथ्यता र सन्धिखर्क नगरपालिकाका उपप्रमुख ठाकुर कुमार वि.क. विशेष आतिथ्यतामा सो कार्यक्रम सम्पन्न भएको थियो । कार्यक्रममा उद्योग वाणिज्य संघका अध्यक्ष श्री युवराज श्रेष्ठ, प्र.ना.उ. श्री नवराज मल्ल लगायत सबै सुरक्षा निकायका प्रमुखहरू र सुरक्षाकर्मीहरू, पत्रकार महासंघका अध्यक्ष श्री हिम बहादुर जि.सी. लेकाली लगायतका सञ्चारकर्मीहरू, सन्धिखर्क नगरपालिकाका जनप्रतिनिधिहरू, राजनीतिक दलका प्रतिनिधिहरू, जिल्ला स्थित अन्य सबै सरकारी कार्यालयका कार्यालय प्रमुख र राष्ट्रसेवक कर्मचारीहरू, उद्यमी व्यवसायीहरू र विभिन्न विद्यालयका शिक्षक तथा विद्यार्थीहरूको उपस्थिति रहेको थियो । कार्यक्रममा भूकम्पका कारण ज्यान गुमाएका व्यक्तिहरूको सम्झनामा १ मिनेट मौन धारण गरी श्रद्धान्जली अर्पण गरिएको थियो । भूकम्पबाट हुने जोखिम र क्षतिलाई न्यूनिकरण गर्न कार्यक्रममा उपस्थित सबै सहभागीबाट प्रतिबद्धता ब्यानरमा हस्ताक्षर गरि प्रतिबद्धता जनाईएको थियो । कार्यक्रममा आफ्नो मन्तव्य राख्दै जिल्ला समन्वय समिति प्रमुख श्री पिताम्बर शर्मा भुसाल र नगर उपप्रमुख श्री ठाकुर कुमार वि.क. ले भूकम्पको जोखिमबाट बच्न भूकम्प प्रतिरोधी संरचना निर्माण गर्नुपर्ने र यसका लागि सचेतना जगाउने कार्यक्रम संचालन गर्नुपर्ने विषयमा जोड दिनुभयो । कार्यक्रमका अध्यक्ष एवं प्रमुख जिल्ला अधिकारी श्री प्रेमलाल लामिछानेले नेपाल भूकम्पीय जोखिमको दृष्टिकोणले अत्यन्त संवेदनशील रहेको र यसले ठूलो मानवीय एवं भौतिक क्षति गर्न सक्ने भएकोले समय मै सचेत भई जोखिम एवं क्षति न्यूनिकरणका उपायहरू अवलम्बन गर्न र भूकम्पीय जोखिम र क्षतिलाई न्यूनिकरण गर्ने दिशामा सदैव लाग्न अनुरोध गर्नुभयो । कार्यक्रम जिल्ला विपद् व्यवस्थापन समितिका सदस्य सचिव सहायक प्रमुख जिल्ला अधिकारी श्री विक्रम थापाको सञ्चालनमा सम्पन्न भएको थियो ।
